عدت سنة

أهـلي لا أهـلك... ولا أهـلك ســـاعـات أهـلك

ماتحكيليش على اللي قتلك..مش هاخدلك تار

مامـلـكش غير أحـسدك خـالـص على قـــتلـك

قــتـيـل فـي غـربة بيفـرق عـن قــتـيـل الـــدار

يا مـاشي للموت... ومش مـاشي على مهلك

وإحـنــا خــطـاوينا يم المــوت تـجـيب الـعـــار

الموت على الأسفلت - عبد الرحمن الأبنودي

ما يقع إلا الفاشل

أنا لن أسقط أبداًً

لأني في القاع

ماذا أقول له ؟

إذا ما قال لي ربـي...أما استحييت تعـصيني ؟

وتخفي الـذنب عـن خـلـقي وبالعصيان تأتـيـني

فكيف أجيب يا ويحي..ومن ذا سوف يحميني ؟

قسوة أم

الله يسامحك....معقول يا أمي تجـرحيني ؟
بعد ما بــعتي عـمرك عشاني....بتبيـعيني
ده إنـت طول عـمرك يـا غالية بـتـراعيني
فـي صغـر سـنـي وبـعد مـا جريت سنيـنـي
ده إنـتي حـالفة في عز زعلك..ماتزعليني
ولا عـشــان مـا وفـيتش حقك..بتجازيني ؟
ده جـزائـي ؟ إنــك يا أمــي تـدمــريــنـي ؟
طـب قولـي حـاجـة قــبـلـها....حـذريــنــي
ولا حــتـي يـا أمـــي كــنـتـي هــدديــنـــي
مـش مـرة واحـدة تـقسي عـليّ وتدبـحيني
ليـه يا أمـي ؟! ليـه تـموتي....وتسيبيني ؟

التذكرة لا تزال في جيبي

مبدئياً كده أنا زملكاوي ومش جاي أكتب على الكورة

لسببين

أولاً حالة الإحباط بسبب خسارة الكاس

ثانياً حالة الإحباط بسبب خسارة الكاس برضه

المهم..أنا بكتب عن تجربتي في دخول الاستاد في مباراة نهائي الكاس

أولاً وقبل أن يتهمني أحد بأني محدث ماتشات..أنا مشجع قديم في الاستاد..من أوائل التسعينيات كده

بس من فترة ماروحتش..طبعاً السبب واضح من أول البوست

ما علينا

المهم روحت الاستاد بعد شراء التذاكر من السوق السوداء..وده بسبب العباقرة اللي قرروا يحاربوا السوق السودة بطرح تذاكر المباراة قبل معادها بأيام..غالباً عشان تجار السوق السودة يشتروا بدري ويحسوا إنهم استثمروا فلوس وعطلوا راس مالهم كام يوم..وتبقي تجارة شرعية

بعد توفير التذاكر..دخلنا في الجد بقى..الدخول من البوابة

زحام شديد وتكتلات بشرية..وتتطلع التذكرة في إيدك وترفعها فوق عشان العساكر تشوفها..ناصحين قوي حكومتنا

وفجأة..تلاقي اللي بيشجعك ويديك دفعة للأمام

مين دول بقى؟..دول إخوانك من المشجعين اللي مستعجلين..ومش هاممهم إن الباب مقفول وبيزقوا اللي قدامهم عشان ينجزوا

طب يا جماعة الباب مقفول والزق مش هيجيب نتيجة غير فعص اللي قدام الباب وبعدين فعص اللي وراه

تسمع الرد المثالي..هيلا هوب..هيلا هوب

عديت مرحلة الزحمة..ودخلت في مرحلة الاختناق وضيق التنفس

ولا حد بيبص إن ممكن طفل يتدهس..ولا كبير يتخنق..المهم نزق اللي قدامنا..واللي ورانا يزقنا

بدأ عساكر الأمن المركزي يلوشوا في أفراد المقدمة..وبقى الأمن المركزي من أمامكم والهيلا هوب من خلفكم

ولا عزاء لمرحلة الوسط

عديت مرحلة ضيق التنفس..ودخلت في مرحلة الاحتضار

طب لو مت أقول إيه لربنا ؟ كنت رايح الماتش واتفرمت ؟

يعني لا مت في غزوة..ولا مت في حادثة..ولا على الفراش

أقوله أنا جايلك ميت في نهائي الكاس ؟ حاجة تكسف أكيد

وطبعاً مبرر الناس اللي بتزق واضح..حكومة بنت ستين كلب..عاملين الباب صغير ليه..وكمان قافلينه..زق يا عم

طب يا عم الحاج إديني فايدة واحدة استفدتها غير إنك كنت هتموت اللي قدامك من أطفال وكبار السن..وشباب كمان

ولا المهم إن العيب يبقى في الحكومة..ناس تقولك أصلهم أهلوية وعايزين يخنقوا الجمهور..وناس تقولك عايزين يدخلوا قرايبهم من غير تذاكر..المهم العيب في الحكومة

بيفكرني بواحد أعرفه..بأقوله شوف يا جدع الشمس طالعة والدنيا بتمطر..قال لي أيوه..حكومة بنت كلب وسخة

المهم عدى عليَ الموقف ده تلات مرات..لحد آخر بوابة

وكل مرة لازم ترفع التذكرة لفوق عشان العساكر يتأكدوا إن معاك تذكرة..وفي الآخر اكتشفت إن فيه بوابة الكترونية

طبعاًَ مش شغالة..وواقف عندها اتنين عساكر..وضابط..زيادة تأكيد عشان يقطعوا التذاكر وماحدش يباصيها لحد يدخل بيها تاني..أنا برضه قلت ناصحين

ودخلت الاستاد

والتذكرة..لا تزال في جيبي

ياخي ارجع

أبا الليل ارجع..فـقـد طــــــالت لـياليـــنا
ونحن عَطاشى ومن من دونك يروينــــا
واساك العم ناجي دون أن تشـكي لـه همٌ
فمن من بَعدك بدون الشكوى يواسـينا ؟
في نـفـس المحنة وعـدت بألا تـفارقــنا
وأنــت الـــحـر ووعـدك ديـنٌ..فوفـيـنا
عاتـبـت صديقك يومـاً حيـنـما تـركـــك
والـيـوم أتـيــت بـنـفس الجرح تدمــينا
أتذكر رِحابك من سنوات عندما فُقِدت ؟
أجـئت الآن بـنفـس الكـأس لــتسقـينا ؟
رجل المتناقضات..كما عهدناك تُضحكنا
ويقـسى القـلب من الضــحكات..فتُبكينا
واليـوم تركـت الجـرح فـينا مـلتـهــــب
فهيّـا لجـرحك..هـــيّا ارجــع وداويـــنا
قَــسى علـيــنا الــلــيل يـــا أبـا الـلــيـل
فـمـن لـنا غيـرك من أبـنائـك يحمينا ؟
أبـا الـلـيل عـندما تعود ستجدنا ننتظرك
واحذف (لأعود يوماً) فتلك الكلمة تُدمينا
أبا الـلـــيل إن أردت رحـيلاً فـلـن نـقبـل
بـغـيرك بــعـد رحـيـلـك..كــي يــُعـزيـنا

قليل من الماء يطهره

ذهب رجل إلى الشيخ ليستفتيه في كلب بال على جدار فقال له الشيخ تهدمه وتبنيه سبعاً..فقال له الراجل طب إيدك معانا يا عم الشيخ عشان ده الجدار اللي بيني وبينك..فقال الشيخ...قليل من الماء يطهره

كام مرة شفت حد بيعمل كده واتضايقت منه ؟ طيب كام مرة بقى إنت عملت كده ؟
أنا أعرف واحد في بداية الانتفاضة الفلسطينية في ذروة المناداة بمقاطعة كل ما هو أمريكي كان يؤيد بشدة المقاطعة..ويهاجم بشدة ما يستخدم أي أمريكي..بطل السجاير الأمريكي..والحاجة الساقعة الأمريكي..والأكل الأمريكي..وأصدر فرمان في البيت بمنع مساحيق الغسيل الأمريكي
طب جميل..فين المشكلة بقى ؟
المشكلة إنه كان بيضارب في الأسهم في البورصة الأمريكية في الوقت ده..بس دي مادخلتش في المقاطعة..طيب ليه ؟
ممكن عشان الفايدة اللي بتعود على الاقتصاد الأمريكي من السجاير والبيتزا وما شابه أكبر بكتير من البورصة ؟...مافتكرش
طب ممكن مثلاً عشان بيكسب من البورصة وأي مكسب أكيد بيقابله خسارة لواحد تاني أمريكي..وجهة نظر برضه
في اعتقادي أن دفع الفلوس في المنتجات الأمريكية زي جمع الفلوس من البورصة الأمريكية..لو الاتنين صح مافيش مشكلة..ولو الاتنين غلط يبقى الفرق الوحيد إن مسحوق الغسيل الأمريكي بيسيب نجاسة في الهدوم حتى لو اتشطفت ألف مرة..أما الربح من البورصة الأمريكية..فقليل من الماء يطهره.
ملحوظة على جنب..طبعاً مافيش حد عرف إن الواحد ده..يبقى أنا

قال أبو الأسود الدؤلي
فإذا جريت مع السفيه كما جرى...فكـلاكما في جـريه مـذمـوم

وإذا عتبت على السـفيه ولمـته...في مثل ما تأتي فأنت ظلوم

يا أيـها الرجــل المــعــلم غــيـره...هلا لـنـفسك كـان ذا التعليم

لا تــنـــه عن خـلق وتأتي مثـله...عـار عـليـك إذا فـعـلت عظيم

غضبنا وثرنا وانتفضنا عندما رفع لاعب من غانا في كأس العالم الأخير علم إسرائيل..كلام جميل ولكن
تعرف إن في كاس العالم الأخير عشر دول من جيش التحالف في العراق..أشهرهم بريطانيا "إنجلترا كروياً", إيطاليا, هولندا, والبرتغال
طب كام واحد فينا بيشجعهم ؟ وكام واحد معجب بالتنظيم الإنجليزي..والصلابة الإيطالية..والطاحونة الهولندية..وجمال الأداء البرتغالي
كام علم للدول دي معلق في المقاهي وموجود في خلفيات الكمبيوتر ؟ كام فانلة لبيكام وتوتي ونسترلوي لابسينهم ؟ طب ماهو ده علم محتل وده علم محتل..الفرق إيه ؟ هي يعني النجمة السداسية بس اللي وحشة ؟

بالمناسبة دي مش دعوة إننا نقول مافيش فايدة ولو كل واحد ساكنة فوقه رقاصة عزل البلد كلها حتبات في الشارع.. وخلاص بقى بايظة بايظة ونكون كبني إسرائيل "كانوا لا يتناهون عن منكر فعلوه..لبئس ما كاموا يفعلون"..بس برضه مانبقاش من نص البشر اللي بيحاول يصلح عيوب النص التاني..ونتذكر قول الله "أتأمرون الناس بالبر وتنسون أنفسكم"
بس دي دعوة لكل واحد يفكر في اللي بيعمله ويراجعه..هيلاقي بلاوي ومصايب..لا مصايب إيه..هيلاقي كوارث
احكم على اللي بتعمله إنت قبل ما نحكم على اللي بيعمله غيرك..وخصوصاً أنا...لأن اللي باعمله أنا
قليل من الماء يطهره

في ذكرى النكسة

وقرن في بيوتكن

ركبت الأوتوبيس..
كل يوم أركب الأوتوبيس بعد الشغل..أمشي محطة زيادة عشان أركب الأوتوبيس من الموقف وألحق كرسي
لما بيوصل الأوتوبيس للمحطة اللي عند الشغل بتتملي الكراسي..وبعدها بمحطتين بتتملي جميع الفراغات اللي في الأوتوبيس
ركبت هي كمان الأوتوبيس..بعدي بمحطتين
امرأة في بداية الأربيعينيات..محجبة..مثلها كمثل الآلاف من النساء اللي بنشوفهم يومياً..واضح جداً كأنه مكتوب عل جبينها إنها موظفة حكومة
تحمل شنطة يدها..وفي اليد الأخرى شنطة العيش
وقفت جنبي عند الكرسي..أقوم وأقعدها مكاني ؟
فكرت قليلاً..
تعبان أنا..تعبان في الشغل
تسع ساعات شغل يهدوا الحيل..وأظن إني أستاهل كرسي في الأوتوبيس بعد التعب ده
بعدين أقوم ليه..مش هما بيطالبوا بالمساواة..قمة العدل والمساواة أن من يركب أولاً يجلس..ولا عزاء للمتأخرين
ثم لماذا لا يقرن في بيوتهن ؟
مش المفروض إن الستات مكانها البيت..والرجالة هما اللي بيشتغلوا ويتعبوا..ماهي لو قعدت في بيتها أكيد هتلاقي كرسي فاضي
وياريت في الآخر بيشتغلوا..لأ دول بيروحوا الشغل يتكلموا ويهزروا ويخلصوا شغل البيت ويروحوا..وتخيلت إن شنطة العيش اللي معاها فيها كمان الخضار اللي جهزته في وقت الشغل.
ارتحت كثيراً لهذه الفكرة واسترخيت على الكرسي.
ازدحم الأوتوبيس وبدأ الركاب في الالتصاق بعضهم ببعض
وبدأت أفكر تاني..هما بيشتغلوا ليه أصلاً ؟ عشان يصرفوا مرتبهم على الهدوم والمكياج
المفروض إن جوزها يشتغل ويجيبلها مكياج وهدوم..عشان تتزين في البيت مش تخرج للناس
أيوه..المفروض أن يقرن في بيوتهن
نظرت لوجهها..لا يوجد أي أثر للمكياج..بل أثر لمسحة حزن لا أعلم هل بسبب ضغوط العمل أم ضغوط الحياة المادية أم ماذا
نظرت لملابسها فلمحت أثر لخياطة في كم البلوزة..
يعني لا مكياج ولا هدوم..أمال يا ترى بتصرف مرتبها في إيه ؟
فكرت مرة أخرى..خاصة مع زيادة الازدحام
وجدت رجلاً في حوالي الخمسين من عمره يلتصق بها..ليس عن عمد ولكن بفعل الزحام
غليت الدماء في عروقي..أي رجل هذا زوجها
إزاي سايب مراته في الزحمة وسط رجالة..إزاي يسيب غيره يلمس مراته..لأ ومش مرة واحدة ده أكيد بيحصل كل يوم
لو كانت فعلاً ست محترمة كانت قعدت في بيتها..
نعم..النساء المحترمات هما اللائي يقرن في بيوتهن
نظرت للمرأة..وجدتها متعبة شاردة..وكأنها لا تحس بالرجل من الأساس..
نظرت للرجل..فوجدته مثلها..قد يكون بسبب همومه هو الآخر..أو بسبب عدم وجود أي سبب يدعوه للإثارة في تلك المرأة..فهي محجبة محتشمة..منهكة متعبة.
نعم لا يوجد سبب..ولكن درءاً للفتنة..قرن في بيوتكن
ولكن أليس أدعى لدرء الفتنة أن أقوم لها ,وأجلسها بعيداً عن الزحام ؟
فكرت قليلاً..
وبعد محطتين اتخذت قراري الأخير..
قمت من مقعدي..وناديت عليها
اتفضلي اقعدي
فقد كنت...
نازل المحطة الجاية

.

.

تحديث متأخر: فكرة البوست (مسروقة) من قصة قصيرة قريتها زمان, والباقي من عندي

سيبك إنت..مافيش أحسن من الأمانة العلمية